མེད་གླུ་ཟབ་མདོའི་ཟློས་གར།
ཨ་ཨ་ཨ།།
ཆོས་དབྱིངས་ངོ་བོ་བདེན་གྲུབ་རྡུལ་ཙམ་མེད།།
འོད་གསལ་རང་བཞིན་མ་དག་སྣང་བ་མེད།།
སྤྲུལ་སྐུའི་ཐུགས་རྗེ་རྫུན་ཚིག་དྲི་མ་མེད།།
མེད་གླུ་འདི་ལ་འཁྲུལ་བ་ཏིལ་ཙམ་མེད།།
སྨྲ་བསམ་བརྗོད་མེད་ཤེས་རབ་ཕར་ཕྱིན་མེད།།
མཚན་ཉིད་མེད་དང་མ་སྐྱེས་མ་འགགས་མེད།།
དྲི་མ་མེད་དང་དྲི་བ་གང་ཡང་མེད།།
དུས་གསུམ་དུས་མེད་འཁོར་འདས་གཉིས་ཀ་མེད།།
བླ་མ་རང་རིག་ཉིད་ལས་ལོག་ན་མེད།།
ཡི་དམ་རྒྱལ་བ་འཁོར་བའི་ཀློང་ན་མེད།།
མཁའ་འགྲོ་དྲན་ཤེས་སེམས་པའི་ཕྱི་ན་མེད།།
ཆོས་སྐྱོང་ཕྱོགས་རིས་མཛད་པའི་རྣམ་ཐར་མེད།།
དཔྱད་གསུམ་རྣམ་པར་དག་ན་གང་ཡང་མེད།།
གཟུགས་མེད་སྒྲ་མེད་དྲི་མེད་རོ་ཡང་མེད།།
རེག་བྱ་ལ་སོགས་ཚོགས་དྲུག་ཕྱི་ནང་མེད།།
ཁམས་དང་སྐྱེ་མཆེད་མེད་ཀྱང་རྟེན་འབྲེལ་མེད།།
སྟོང་པ་ཉིད་མེད་ངོ་བོ་ཉིད་ཀྱང་མེད།།
ས་ལམ་ཡེ་ཤེས་ཡོན་ཏན་རྣམས་ཀྱང་མེད།།
བདེ་གཤེགས་ཉིད་མེད་ཐོབ་དང་མ་ཐོབ་མེད།།
བདག་ལ་འཇིགས་པ་མེད་ཀྱང་སྐྲག་པ་མེད།།
ཏདྱ་ཐ། ཨོཾ་ག་ཏེ་ག་ཏེ་པ་ར་ག་ཏེ་པ་ར་སཾ་ག་ཏེ་བྷོ་ཏི་ཡེ་སྭཱ་ཧཱ།
མེད་གླུ་ལེན་དང་བླངས་འཁན་པོ་ཡང་མེད།།
ལྷ་མེད་སྔགས་མེད་དམ་ཚིག་སྡོམ་པ་མེད།།
རྣམ་གྲངས་ཡོད་མེད་སྤྲང་པོའི་མནའ་ཚིག་མེད།།
ཅི་ཡང་མེད་པའི་རྒྱང་འཕེན་པ་ཡང་མེད།།
མེད་པའི་མེད་ངོ་ཤེས་པའི་གདམས་ངག་མེད།།
མེད་པ་རྟག་ཆད་གོལ་སའི་གཡང་ས་མེད།།
མེད་དང་ཡོད་མེད་རྩོད་པའི་དོ་ར་མེད།།
མེད་པ་གནམ་ས་མེད་ཀྱང་ང་ཡང་མེད།།
སྦྱོར་བ་ཀུན་སློང་བཟང་ངན་གང་ཡང་མེད།།
དངོས་བཞི་དམིགས་བཅས་དམིགས་མེད་གང་ཡང་མེད།།
རྗེས་སུ་བསྔོ་བ་སྨོན་ལམ་གང་ཡང་མེད།།
མེད་མེད་ཐམས་ཅད་མེད་དོ་ས་མ་ཡ།།
འགགས་པ་མེད་ཀྱང་སྐྱེ་བ་ཐམས་ཅད་མེད།།
ཆད་ལ་མེད་ཀྱང་རྟག་བརྟན་འཛིན་པ་མེད་
འོང་བ་མེད་ཀྱང་འགྲོ་དང་འགྲོ་སར་མེད།
སྤྲོས་པ་མེད་ཀྱང་མ་སྤྲོས་ཟེར་བ་མེད།
ཅེས་པ་འདི་ཡང་རབ་གནས་ས་ཁྱི་རྒྱལ་ཟླའི་དབང་ཕྱོགས་སྟོང་པ་གསུམ་པར་ཨ་བདག་མེད་ཀྱི་ངོར་ཤྲཱིཿཨེ་མ་ཧོས་ཨེ་ཝཾ་ཀུན་བཟང་ཆོས་གླིང་ནས་སྤྱི་ལོ་༢༠༡༩-༡-༤ལའོ།།